الصفحة الرئيسية › اقتصاد

اقتصاد بسبب التعطيلات الادارية والقهر: باعث مشروع القبة الإيكولوجية أمين الزين يحاول الانتحار بمقر ولاية سليانة

اقدم الشاب أمين الزين وهو باعث مشروع القبة الإيكولوجية بمنطقة جبل السرج على محاولة انتحار يوم الاثنين 7 جانفي بمقر ولاية سليانة وقد تم نقله للمستشفى في حالة حرجة. 

أمين الزين شاب متحصل على شهادة عليا، بادر ببعث مشروع القبة الإيكولوجية التي لاقت اعجاب العديدين، وبسبب التعطيلات الادارية، تحول نجاح الباعث الشاب الى كابوس دفعه الى محاولة الانتحار للفت أنظار السلطة للمصاعب التي تعترض طريقه.

 

وقد قدّم الناشط الحقوقي كريم بوزويتة الشهادة التالية حول أمين الزين:

"ليوم أمين الزين حاول ينتحر.
أمين ماهوش قاعد في قهوة و ساعة ساعة يعتصم ويتظاهر على"حقو في الوظيفة العمومية".
بالعكس، أمين شاب من سليانة، باعث مشروع. وما هوش أي مشروع : مشروع سياحة ايكولوجية Eco-domes Sodga

في شهر آفريل إلي فات، سهرت مع أمين في جبل السرج، وحكالي كيفاه يحلم يحول المنطقة إلي يعيش فيها إلي معقل ثقافي وايكولوجي. وأكبر حلمة عندو، يلم 2 ملايين يسافر للهند، يعدي شهر الغادي. 
في دول أخرى، أمين يلقى ألف إعانة مادية ومعنوية. لكن أمين تونسي.
والسلطات المحلية في بلاصة تعاونوا ابش يطور مشروعو، عيفتو في حياتو شهر بعد شهر،
ووقفتلو مشرعو حتى لين ايس وإليوم سلم و حاول الإنتحار. توا أمين في coma

وإلي يغيض فوق هذا الكل: 
-كان جاء أمين كناطري راهو يبيع في مازوط ليبيا قدام كراهب الحرس ويلم في البكوا وحد ما كلمو 
-كان جاء أمين يتاجر بارواح شباب تونس و يهز فيهم مالجامع لسوريا، راهو كدس الملايين وعندو الحصانة السياسية مالفوق
-كان جاء أمين لحاس في حزب رهو معتمد يتعين bel'SMS 
-كان جاء أمين سرق 200 مليون وطبال في حزب، راهو إنتفع بعفو رئاسي 
-كان جاء رجل عمايل كدس المليارات بالسرقة، راهو عملولو قانون مصالحة خاتم قد صبعو
-كان جاء أمين منحرف في عصابة نقابية، راهو عندو بيرو وكرهبة وبونوات اسونس و منحة مردودية و منحة علوش و منحة عودة مدرسية و منحة السخط على ريوسهم.

العدالة مهاش امتياز القوي...العدالة هي حق الضعيف.
إلي يحب يحكم الشعب هذا، لازمو يحط الفكرة هاذي ما بين عينيه، على خاطر أغلبية التوانسة هما ليوم، بصفة أو أخرى، أمين الزين.

خلي أمين يخدم".